Samsung-un yeni büdcəli planşeti olacaq Galaxy Tab A9 Geekbench bençmarkının məlumatlar bazasında ortaya çıxıb. Beləliklə Geekbench məlumatlarına əsasən Galaxy Tab A9 planşeti 4 GB RAM-a və Android 13 əməliyyat sisteminə sahib olacaq. Planşetin sahib olacağı prosessora gəldikdə isə məlumata əsasən planşet 2.0 GHz tezlikdə çalışan 6 ədəd nüvəyə, 2.20 GHz tezlikdə çalışan 2 ədəd nüvəyə və Mali-G57 MC2 qrafik çipinə sahib prosessor vasitəsilə çalışacaq.
Bu göstəricilər isə MediaTek Helio G99 prosessorunun göstəricilərinə bənzəyir. Galaxy Tab A9 Geekbench-in bir nüvəli testi çərçivəsində 735 xal, çox nüvəli testi çərçivəsində isə 1766 xal toplayıb. Geekbench-in məlumatlar bazasında sözügedən planşet barəsində digər bir məlumata rast gəlinməyib. Lakin daha əvvəlki məlumat sızıntılarına əsasən Galaxy Tab A9 özündə 5G modemi, 8 düym ölçülü ekranı və 15 vatt gücündə sürətli şarj texnologiyalı 5100 mAh enerji tutumlu batareyanı birləşdirəcək. Galaxy Tab A9-un bu ilin sonuna kimi təqdim olunacağı gözlənilir.
