Redmi 12 5G smartfonu ilə birlikdə Redmi brendi həmçinin Redmi Watch 3 Active adlı yeni büdcəli smart saatını təqdim edib. Bu yeni smart saatın özəllikləri arasında uzun müddət ərzində çalışma, sudan qorunan gövdə və telefon zənglərinə cavab vermə imkanı var. Beləliklə Redmi Watch 3 Active smart saatı 280×240 piksel keyfiyyətli 1.83 düym LCD ekran ilə təchiz olunub. Ekranın maksimal parlaqlıq səviyyəsi 450 nit təşkil edir və o, 200 ədəd virtual siferblat dəstəyini özündə birləşdirir. Smart saat smartfona Bluetooth 5.3 vasitəsilə qoşulur və üstəlik smartfona daxil olan zənglərə özündə olan mikrofonlar və səsgücləndirici sayəsində cavab verməyə imkan verir.
Redmi Watch 3 Active 100-dən çox idman rejimini dəstəkləyir, qandakı oksigen miqdarını və ürək döyüntülərini ölçür və o cümlədən yuxu keyfiyyətini monitorinq edə bilir. Bununla yanaşı smart saat qadınlarda menstrual dövrə nəzarəti təmin edir. Məlumata əsasən Redmi Watch 3 Active bir dəfə şarj olunandan sonra 8 gün ərzində intensiv rejimdə, 12 gün ərzində isə adi rejimdə çalışa bilər. Smart saatın gövdəsi 50 metr su dərinliyinə enişə tab gətirə bilir. Redmi Watch 3 Active yaxın günlərdə satışa çıxacaq və təqribi olaraq 37$-a satılacaq.
