Xiaomi şirkətinin əvvəlki illərdə təcrübəsinə istinadən güman etmək olar ki, bu ilin sonuna yaxın təqdim ediləcək Xiaomi 14 smartfon seriyasına 4 model daxil olacaq. Xiaomi 14, Xiaomi 14 Pro, Xiaomi 14 Lite və Xiaomi 14 Ultra. Lakin şirkət Xiaomi 14 Ultra-nı gələn ilin yaz fəslində təqdim etməlidir. Digital Chat Station ləqəbli məşhur insayder Xiaomi 14 Pro ilə Xiaomi 14 Ultra-nın arasında qərarlaşacaq daha bir Xiaomi 14 modelinin təqdim oluna biləcəyini söyləyib.
Smartfonun Xiaomi 14 Pro+ adını əldə etmə ehtimalı yüksəkdir. İnsayder bildirib ki, sözügedən Xiaomi 14 modeli 5 qat optik zoom-a və 120 qat hibrid zoom-a sahib periskop kameranı və 50 MP-lik əsas arxa kameranı özündə birləşdirəcək. Bununla yanaşı smartfon 2K keyfiyyətli ekran ilə təchiz olunacaq və ekranın kənar hissələri əyilmiş dizaynda reallaşdırılacaq. Həmçinin smartfon maksimal dərəcədə nazik ekran ətrafı çərçivələri əldə edəcək.
