Öz iddialı layihələri ilə tanınan Elon Musk bu dəfə də hamını təəccübləndirə bilib. Bu dəfə o, Twitter-in rebrendinqi çərçivəsində @X loginini Twitter istifadəçisinin əlindən alıb. Halbu ki, istifadəçi sözügedən logini 2007-ci ildən istifadə edirdi. İstifadəçi bu barədə heç bir xəbərdarlıq və ya bildiriş əldə etmədən onun hesabı yeni hesab adına yönləndirilib. San-Fransiskodan olan Gene Hwang adlı Twitter istifadəçisi @X loginini 16 il ərzində idarə edib. O, sözügedən hesab adının şirkət tərəfindən onun əlindən alınması məktubunu görəndə bir xeyli təəccüblənib. Məktubda qeyd edilmişdi ki, onun @X logini artıq Musk-ın şirkətinə məxsusdur.
Hwang bildirib ki, ona bu barədə daha öncədən heç bir bildiriş və ya xəbərdarlıq göndərilməyib. Logini əldə edəndən sonra şirkət @Twitter adına sahib hesabdakı bütün abunəçiləri @X adına sahib hesaba köçürüb. Bununla yanaşı Hwang bildirib ki, şirkət hesab adının onun əlindən aldığına görə ona heç bir təzminat ödəməyib. Ona sadəcə olaraq şirkətin promo məhsuilları və şirkət rəhbərliyi ilə görüş təklif edilib. Hesab adının istifadəçinin əlindən alınmasına dair bu hadisə istifadəçilərin sosial şəbəkələrdə hüquqları barəsində düşünməyə vadar edir. Günlərin birində sizin hesabınızı əlinizdən alsalar onda necə? Bu cür hadisə sosial şəbəkələrdə şəffaflıq və ədalətli çalışma suallarını yenidən qaldırır.
