Huawei şirkəti orta qiymət seqmenti üçün nəzərdə tutulmuş yeni noutbukunu təqdim edib. Söhbət, MateBook D 14 BE adlı noutbukdan gedir. Sözügedən yeni noutbuk balanslaşdırılmış texniki göstəricilərə sahibdir. O, evdə və ofisdə çalışmaq üçün nəzərdə tutulub. MateBook D 14 BE 60 Hz-lik təsvir yenilənməsinə sahib 1920×1080 piksel keyfiyyətli 14 düym IPS ekran ilə təchiz olunub. Ekran NTSC rəng diapazonunun 45%-ni əhatə edir.
Bununla yanaşı noutbukun qapağını 180 dərəcə açmaq mümkündür. Əsas texniki göstəricilər baxımından MateBook D 14 BE modeli Intel Core i3-1215U prosessoru, 8 GB RAM və 256 GB SSD ilə təchiz olunub. Noutbukda qrafik özəlliklərdən Intel UHD adlı inteqrasiya edilmiş qrafika cavabdehdir. Noutbukun batareya həcmi isə 42 vatt saat təşkil edir və o, 65 vatt gücündə sürətli şarj texnologiyasını dəstəkləyir.
MateBook D 14 BE özündə 2 ədəd səsgücləndiricini, 720p keyfiyyətində olan veb kameranı və yandırıb/söndürmə düyməsinə inteqrasiya edilmiş barmaq izi skanı texnologiyasını birləşdirir. Noutbuk USB Type-C, HDMI 2.0, bir neçə USB Type-A girişlərinə və naqilli qulaqlıqlar üçün 3.5 mm-lik audiogirişə sahibdir. MateBook D 14 BE artıq Çin bazarında 550$ qiymətində satışa çıxıb. Onun digər regionlarda satılıb-satılmayacağı bilinmir.
