Apple şirkətinin Vision Pro adlı qarışıq reallıq (AR + VR / Mixed Reality) cihazını təqdim etməsi ilə investorlar AR/VR sahəyə yenidən diqqət ayırmağa başlayıblar. Vision Pro təqdim olunmamışdan öncə isə bu sahəyə maraq çox az idi. AR/VR sahəsində fəaliyyət göstərən startaplar uzun müddət ərzində lazımi səviyyədə maliyyələşdirmənin olmamasından əziyyət çəkirdilər. Belə ki, investorlar süni zəka sahəsində fəaliyyət göstərən startapları dəstəkləməyi üstün tuturdular. Lakin Vision Pro-nun təqdim edilməsi ilə bu vəziyyət bir qədər dəyişib.
Apple əmindir ki, vaxtı ikən iPhone-nun mobil cihazlar bazarına göstərmiş olduğu təsiri eynilə Vision Pro AR/VR bazarına göstərəcək. Bu cür arqument isə investorları AR/VR sahəsində çalışmağa başlayan bəzi startapları dətəkləməyə məcbur etdi. İyun ayına olan statistikaya əsasən ABŞ-da bu cür startaplar ümumilikdə 208 milyon dollar investisiya əldə ediblər. Bu isə iyundan öncəki 3 ay ərzində ümumilikdə əldə edilmiş investisiya həcminə bərabərdir. Lakin bu sahədə investisiyalar hələ də azdır. Müqayisə üçün qeyd etmək lazımdır ki, bu ilin əvvəlində ABŞ-ın süni zəka sahəsində fəaliyyət göstərən şirkətlərinə ümumilikdə 31 milyard dollar investisiya yatırılıb.
