iPhone 14 Kaliforniya ştatında bir kişinin həyatını xilas edib. Adı bilinməyən kişi gecə saatlarında avtomobil ilə hərəkət edən zaman 120 metr hündürlükdən uçuruma düşüb. Avtomobilin uçurumun səthi ilə toqquşması zamanı iPhone 14-də Crash Detection funksiyası işə düşüb və smartfon silkələnməni yol nəqliyyat qəzası kimi qeydə alıb. Bu halda smartfon adətən istifadəçinin hər şeyin qaydasında olduğunu təsdiqləməsi üçün 20 saniyə vaxt verir. 20 saniyə ərzində istifadəçidən heç bir reaksiya gəlmədiyi halda smartfon avtomatik şəkildə yardım xidməti ilə əlaqəyə keçir.
Sözügedən hadisə halında isə adı bilinməyən kişinin qəzaya düşdüyü ərazidə mobil rabitə mövcud olmayıb. Nəticədə iPhone 14 Emergency SOS funksiyasından və peyk şəbəkəsi dəstəyindən istifadə edərək yardım xidməti ilə əlaqə yaradıb. Smartfon Apple şirkətinin dəstək mərkəzinə mətnli mesaj və özünün yerləşdiyi yerin koordinatlarını göndərib. Şirkətin mütəxəssisləri isə tez bir zamanda yardım xidməti ilə əlaqə yaradıblar. Axtarış və xilasetmə qrupu qəza yerinə gələn zaman kişinin yardım səsini eşidiblər. Onlar vertolyotdan istifadə edərək kişini uçurumdan çıxara biliblər.
