TikTok öz platformasında növbəti yeniliyi anons edib. Belə ki, TikTok-a mətn formatlı paylaşımların edilməsi dəstəyi gəlib. TikTok-un ilk əvvəl qısa videolar üçün nəzərdə tutulmuş platforma olmasına baxmayaraq müəyyən müddətdən sonra onun daxilində fotoların paylaşılması imkanı da reallaşdırıldı. Bu üsul ilə servis Instagram-ın istifadəçi kütləsinin müəyyən hissəsini özünə tərəf çəkmək istədi. İndi isə görünür, servis öz diqqətini Threads ilə Twitter-in istifadəçi kütləsinə yönəldib.
Yeni funksiya vasitəsilə istifadəçilər TikTok daxilində mətn formatlı paylaşımlar edə biləcəklər. Bundan sonra istifadəçi servis daxilində kameraya keçid edən zaman ona 3 paylaşım variantı təklif ediləcək. Video, foto və mətn. İstifadəçi mətn formatlı paylaşımı paylaşmazdan öncə ona müxtəlif səsləri əlavə edə, paylaşımda location məlumatını qeyd edə və paylaşıma rəyləri aktivləşdirib-avtivləşdirməyə bilər. TikTok-un verdiyi məlumata əsasən mətn formatlı paylaşımlar video və foto paylaşımlar kimi interaktiv və dinamik olacaqlar.
İstifadəçi həmçinin bu cür paylaşımlarda stikerlər ilə hashtag-lardan istifadə edə bilər. Keçən il TikTok öz platforması daxilində fotoların paylaşılması funksiyasını işə salan zaman bir çoxları bu funksiyaya skeptik yanaşmışdılar. Lakin müəyyən müddətdən sonra sözügedən funksiya TikTok-un ayrılmaz hissəsinə çevrildi. Çox güman ki, eyni hal həmçinin mətn formatlı paylaşımların edilməsi funksiyası ilə də baş verəcək. Qeyd etmək lazımdır ki, bəzi TikTok istifadəçiləri servis daxilində artıq video və foto şəklində mətnli paylaşımlar edirlər.
