Smartfon istehsalçılarının əksəriyyəti öz cihazlarındakı ekranları çərçivəsiz adlandırsalar da, reallıqda onlar çərçivələrə sahibdirlər. Müsbət hal ondan ibarətdir ki, müasir smartfonların ekran ətrafı çərçivələri maksimal dərəcədə nazik olurlar. Lakin Apple şirkəti heç bir çərçivəyə sahib olmayan iPhone hazırlamaq niyyətindədir. Ice Universe ləqəbli məşhur insayderin verdiyi məlumata əsasən Apple şirkəti heç bir çərçivə elementinə sahib olmayan OLED ekranların istehsalı sorğusunu Samsung Display ilə LG Display-ə göndərib.
Gözləntilərə əsasən Apple iPhone-larda yastı formalı bu cür ekranı istifadə etməyi hədəfləyib. Bununla belə bu cür ekrana sahib iPhone-nun gövdəsi hal hazırda aktual olan iPhone modellərinin gövdələri formasında olacaq. Çərçivəsiz iPhone-nun və ya digər bir smartfonun hazırlanmasının əsas qəlizliyi ondan ibarətdir ki, hal hazırda smartfonlardakı çərçivələr altında yerləşdirilən mikrosxemlərin hamısını ekranın alt hissəsinə yerləşdirmək lazımdır. Bununla yanaşı ön kameranı da ekranın alt hissəsinə yerləşdirmək lazım gələcək. Bu cür iPhone-nun nə zaman təqdim ediləcəyi isə bilinmir.
