Honor bu il mütəmadi olaraq yeni cihazlar təqdim etməklə qeyri-adi aktivlik sərgiləyir. Hələ bir həftə bundan öncə şirkət Magic V2 adlı yeni qatlana bilən smartfonunu təqdim etmişdi. Digital Chat Station ləqəbli məşhur insayderin verdiyi məlumata əsasən isə şirkət artıq yeni qatlana bilən smartfonu üzərində çalışır. Bəzi insayderlərin fikirlərinə əsasən şirkətin yeni qatlana bilən smartfonu Magic V Slim adını əldə edəcək.
Digital Chat Station bildirib ki, yeni qatlana bilən smartfon xarici istiqamətə qatlana bilən 2K keyfiyyətli daxili ekranı özündə birləşdirəcək. Çinin Weibo sosial şəbəkəsində Magic V Slim-ə aid olduğu iddia edilən render foto da ortaya çıxıb. Bu fotonun həqiqətən də Honor-un yeni qatlana bilən smartfonuna aid olub-olmadığını söyləmək çətindir. Lakin çox güman ki, smartfon məhz bu cür görünüşə sahib olacaq. Honor Magic V Slim artıq bu ilin sonuna kimi təqdim oluna bilər.
