6 iyul tarixində istifadəyə verilmiş Threads adlı yeni sosial şəbəkənin məşhurluğunun artması səbəbilə .com və .ru domenləri üzrə olan veb resurslara fişinq (phishing) hücumlarının sayı artıb. Dələduzlar istifadəçilərə Threads-i kənar resurslardan yükləməyi və sözügedən sosial şəbəkə daxilində abunəçi sayının artırılmasını təklif edirlər. Bu barədə məlumatı Kaspersky şirkəti verib. Şirkət təmsilçisinin sözlərinə əsasən dələduzlar yeni sosial şəbəkənin istifadəçilər arasında böyük məşhurluğundan sui-istifadə edirlər. Kaspersky mütəxəssisləri dələduzluq məqsədli veb resursları aşkar ediblər. Həmin veb resurslar Threads-də abunəçi sayının guya pulsuz şəkildə artırılması imkanını verirlər.
“Bu cür veb resurslarda final mərhələdə istifadəçilərə hədiyyəli konkurslarda iştirak təklifi edilir. Hədiyyəli konkursda iştirak üçün isə onlarda müəyyən vəsaitin ödənilməsi tələb edilir. Məhz bu üsul ilə istifadəçilər öz vəsaitlərini itirirlər” – deyə Kaspersky mütəxəssisi qeyd edib. Digər bir dələduzluq sxemi çərçivəsində isə dələduzlar istifadəçilərə Threads Coins adlı mövcud olmayan kriptovalyutaya investisiya yatırmağı təklif edirlər. İnformasiya təhlükəsizliyi sahəsində fəaliyyət göstərən digər şirkətlər də bu cür problemlər ilə qarşılaşıblar.
Məsələn təhlükəsizliyin idarəsi üzrə vahid platforma kimi fəaliyyət göstərən Veriti 10 iyul tarixində Threads-i yükləməyi təklif edən bir neçə kənar sayt aşkar etmişdi. Aşkar edilmiş saytlar .com domeninə sahibdirlər. Bu cür saytlar istifadəçiləri Google Drive bulud yaddaşına yönləndirirlər. Nəticədə istifadəçilər öz cihazlarına zərərli APK faylı yükləmiş olurlar. Məlumatda qeyd edilib ki, Threads-in özündə kriptovalyuta fəaliyyəti ilə bağlı çoxlu sayda saxta hesab ortaya çıxıb.
