İslam şəriətinə görə yalnız əti yeyilən və şəriətdə nəzərdə tutulmuş şəkildə başı kəsilən heyvanın əti, dərisi pak (təmiz) olur. Əks halda heyvanın dərisi də, əti də murdardır, nəm halda dəydiyi yeri də murdar edir. Namaz qılan zaman bu şərtlərə xüsusi riayət etmək lazımdır. Çünki namaz qılan şəxsin bədəninin və paltarının pak olması vacib şərtdir. Əgər namaz zamanı bədən və paltar murdarlığa bulaşarsa, namaz batil sayılar. Çində və ya başqa qeyri-msəlman ölkələrində təbii dəridən hazırlanmış ayaqqabıların şəriətə uyğun olaraq kəsilən heyvan dərisindən olması şübhəlidir. Adətın həmin ölkələrdə şəriətə uyğunsuz kəsilən və ya ümumiyyətlə əti yeyilməyən heyvanların dərisindən istifadə olunur. Bu cür ayaqqabını geyinmək öz-özlüyündə günah deyil, amma ayaq tərləyəndə və ya hər hansı başqa rütubət yarananda dərinin nəmliyi ayağa və coraba keçir, oradakı nəmlik vasitəsilə də başqa yerlərə ötürülür. Murdarlığa bulaşmış bədənlə və paltarla namaz qılmaq isə olmaz. Ona görə də bu cür ayaqqabıları geyinməmək məsləhətdir. İstisnalar ola bilər, qeyri-müsəlman ölkəsindən gətirilmiş ayaqqabının pak dəridən (yəni bismillahla kəsilmiş mal dərisindən) tikildiyi dəqiq məlum olarsa, ondan istifadə etməyin heç bir maneçiliyi yoxdur. Eyni hökm kəmərlərə, papaqlara da şamildir.
